ILOILO CITY – Matapos ang masobra duha ka semana nga pagpungko bilang ika-29 nga pinuno sang Philippine National Police, ginbalasa ni Police chief Gen. Benjamin Acorda Jr. ang pila ka mga senior police officials.
Lakip sa ginbalasa amo si Police Brigadier General Leo Francisco nga director sang Police Regional Office VI.
Si Francisco ang mangin chief sang Directorate for Operations.
Siya ang temporaryo nga ginbuslan ni Police Brigadier General Archival Macala, ang Deputy Regional Director for Administration sang Police Regional Office VI.
Ginhingadlan ni Acorda si Pol. Lt. Gen. Michael John Dubria, chief sang directorial staff bilang bag-o nga deputy chief for operations nga amo ang third-highest official.
Ginbuslan niya si Police Maj. Gen. Jonnel Estomo nga gin-reassign bilang director sang Directorate for Plans.
Ginbayaan ni Pol. Maj. Gen. Emmanuel Peralta ang iya position bilang pinuno sang Directorate for Operations kag magaserbe bilang chief sang directorial staff nga amo ang ika-apat nga top post.
Si Estomo ang magapamuno sa Directorate for Plans bulos kay Pol. Maj. Gen. Bernard Banac nga amo ang masunod nga chief sang Directorate for Information and Communications Technology Management nga ginapamunuan anay ni Pol. Maj. Gen. Valeriano De Leon nga nagretiro kahapon, Mayo 7.
