ILOILO CITY – Nagpain sang P2.5 million ang Iloilo Provincial Government bilang cash rewards sa mga atleta nga may medalya sa Western Visayas Regional Athletic Association (WVRAA) Meet 2023 nga ginhiwat sa probinsya Aklan.
Sa interview sang Bombo Radyo kay Governor Arthur Defensor, Jr., iya ginpahayag nga nasantu sa Provincial Ordinance No. 2020-217 ang paghatag sang cash rewards sa mga atleta nga nagpangibabaw sa mga sports event.
Magluwas sa mga atleta, lakip man sa makabaton sang reward amo ang mga coaches, assistant coaches, trainers kag chaperones.
Suno kay Defensor, direkta nga ihatag ang cash reward sa kada atleta.
Nahibaluan nga ang Iloilo amo ang overall champion sang Western Visayas Regional Athletic Association (WVRAA) Meet 2023.
Ginpanginbulahan man sang gobernador ang mga atleta sang probinsya.
Ang mga athletes, trainers kag coaches nga nakakuha sang gold medal ang makabaton sang tag-P5,000; P3, 000 ang silver medalists, kag P2,000 para sa bronze medalists.
Para naman sa assistant coaches, P3,000 ang makuha sang gold medalists; P2,500 ang makuha sang silver medalists, kag P2,000 ang bronze medalists.
Sa mga chaperones, P2,000 ang makuha sang gold medalists, P1,500 ang makuha sang silver medalists, kag P1,000 ang iya sang bronze medalists.
Kabug-usan nga 229 gold, 154 silver kag 100 bronze medal ang nakuha sang Iloilo halin sa regular events (elementary level, secondary level), demo sports (elementary level, secondary level) kag paragames.
