ILOILO CITY – Nagalaum ang mga pumuluyo sang Pavia, Iloilo nga masolusyunan na ang pagbaha sa approach sang Ungka flyover.
Ini ang kasunod sang pag-umpisa na sa pag-ubra sang cross drainage sa idalom sang flyover kag ang pag-ubra sang duha ka dako nga mga inlets sa kilid sang dalan sa atubang sang bottling company kag sa atubang sang isa ka mall.
Ginpadako man ang buho sang inlet sang flyover.
Sa interview sang Bombo Radyo kay Pavia, Iloilo Sangguniang Bayan Member Jose Maria “Pyt” Trimañez nga Chairman sang Committee on Transportation, iya ginpahayag nga ang sa tion nga matapos na ang pag-ubra sang cross drainage, madiretso ang tubig sa main drainage sa lugar kag ma-awas sa isa ka creek sang banwa.
Bangud sini, ginalauman nga mangin madasig na ang pag-subside sang tubig sa tion nga mag-ulan.
Pahayag dugang sang natungdan, sa subong, wala pa nakahatag sang sablag sa trapiko ang ongoing works sang Department of Public Works and Highways kag sang contractor.
Sa subong nga ginalauman nga masolusyon ang pagbaha sa lugar, ginahulat naman sang Pavianhon ang pagbukas liwat sang Ungka flyover.
