ILOILO CITY – Arestado ang No. 1 Most Wanted sa Loboc, Bohol matapos nagpanago sa banwa sang Lambunao, Iloilo.
Ini amo si Graciano Pecayo, 44, laborer kag residente sang Candabong, Loboc, Bohol.
Sa interview sang Bombo Radyo kay Police Major Jogen Suegay, hepe sang Lambunao Municipal Police Station, iya ginpahayag nga nadakpan Pecayo pinaagi sa gintingob nila nga pwersa sang Loboc Municipal Police Station sa idalom sang Bohol Police Provincial Office.
Suno kay Suegay, gindakop si Pecayo matapos ginserbehan sang duha ka warrants of arrest bangud sa kaso nga “Acts of Lasciviousness in relation to Republic Act 7610.”
Ang una nga kaso ang may pyansa nga P200,000 kag ang isa naman nga kaso ang may pyansa naman nga P36,000.
Sa subong, gindala na sa Bohol ang arestado matapos temporaryo nga gin-detain sa Lambunao Municipal Police Station.
