Wala nakabutwa ang Gilas Pilipinas sa Cambodia nga nagpreparar sang lima ka naturalized players halin sa Estados Unidos sang Amerika para sa men’s basketball sa preliminary round sang Southeast Asian Games.
Ginlutos sang host country ang Pilipinas,79-68, sa sambuwa sa Morodok Techo Sports Complex subong nga gab-i.
Nagpanguna sa Pilipinas si Christian Standhardinger nga may 14-points kag 11-rebounds; si Chris Newsome nga may 11 points; samtang ang naturalized player naman nga si Justin Brownlee ang naka-amot lamang sang 10 points.
Nagnubo na ang rekord sang Pilipinas sa 1-1 sa Group A.
Matandaan nga duha ka adlaw ang nagligad, ginlutos sang Gilas ang Malaysia, 94-49, sa una nga pagsabak sa 32nd SEA Games sa tuyo nga maangkon liwat ang bulawan nga medalya nga nabuy-an sang nagligad nga tuig.
Kinahanglan nga lutuson sang Gilas ang Singapore sa Sabado agud nga maka-abanse sa knockout stage. Ang top two teams sang kada grupo amo ang mangin kuwalipikado sa semifinals. #
