Nagbalik na sa pang-lima nga pwesto ang Pilipinas sa 2023 Southeast Asian Games sa Cambodia matapos ang siyam ka sunod-sunod nga gold medals nga natipon kahapon, Mayo 14, halin sa weightlifting, judo, esports, wrestling, arnis, kag boxing.
Sa boxing, ang gold medals ang nakuha nanday Tokyo Olympian Carlo Paalam sa men’s 54kg; Paul Bascon sa men’s 60kg; kag isa pa ka Olympian nga si Nesthy Petecio sa women’s 57kg.
Ini naman ang labing-una nga gold medal sang Pilipinas sa wrestling nga courtesy ni Jason Balabal sa men’s Greco Roman 82-kg.
12 ka tuig man ang ginhulat ni Balabal antes madag-an liwat ang gold medal bangud sa ulihi ini nga nangin gold medalist sa 2011 SEA Games sa Myanmar.
Sa arnis, duha ang gold medals sang Pilipinas paagi kanday Jedah Mae Soriano sa lightweight category kag Charlotte Tolentino sa bantamweight.
Sa judo, nadepensahan sang judoka nga si Rena Furukawa ang iya nga gold medal sa women’s -57kg category matapos ginlutos ang Myanmar.
Sa weightlifting, nakuha sang Pinay Olympian nga si Elreen Ando ang gold medal sa women’s 59kg event.
Si Ando man ang nag-set sang panibag-o nga Southeast Asian Games record sa snatch sang amo nga weight category matapos nadala ang 98kg nga naglapaw sa previous record nga 96kg.
Samtang, sa e-sports naman, isa na ka three-time Southeast Asian Games gold medalist ang national esports team nga Sibol matapos ginlutos ang Malaysia, 3-0, sa gold medal match sa Mobile Legends: Bang Bang event.
Magluwas pa ini sa walo sa silvers kag lima ka bronzes nga natipon sang pungsod.
“Napaka-gandang alay para sa Inang bayan sa araw ng mga ina,” kabahin sang post sang Philippine Sports Commission. Ini suno sa komisyon ang pinaka-produktibo nga adlaw para sa delegasyon sang pungsod subong nga SEA Games. #
