Lima ka gold medals ang natipon sang Pilipinas kahapon, Mayo 15, kag nagapabilin nga pang-lima sa 2023 Southeast Asian Games.
Sa weightlifting, gindominar sang Pinay weightlifter nga si Vanessa Sarno ang Women’s 71kg weightlifting competition kag nadepensahan ang iya nga gold medal sang gindala sini ang 225 kg.
Ginsundan ini sang 44-anyos nga playing coach sang Philippine Wrestling team nga si Cristina Vergara nga nakakuha sang gold medal sa Women’s Freestyle Wrestling -65kg competition.
Nangibabaw man ang Pinay arnisador nga si Maria Ella Alcoseba sa Women’s Full Contact Live Stick (Bantamweight) competition.
Sa arnis sa gihapon, nakuha ni Dexler Bolambao ang iya ikaduha nga gold medal sa Arnis Men’s Full Contact Live Stick (Bantamweight) competition!
Ang ika-51 naman nga gold medal ang courtesy sang kickboxer nga si Jean Claude Saclag nga nagdominar sa Men’s Lowkick -63.5kg event.
Ini na ang ikatatlo nga sunod-sunod nga SEA Games gold medal ni Saclag. #
