Ginsigurado sang Gilas Pilipinas nga mangin masakit ang balos sini sa defending champions nga Indonesia sa men’s basketball sa 2023 Southeast Asian Games.
Sa semifinals kagab-i, sa makahalawat-hawat nga hampang, gintib-ong ni Justin Brownlee ang Gilas kag ginkamasaan ang Indonesia, 84-76.
Tatlo ka minutos antes matapos ang final period, nagpaguwa si Brownlee sang back-to-back triple para i-marka ang 76-74 lead para sa team Pilipinas.
Nasundan pa ini sang tirada ni Brownlee kag Brandon Ganuelas-Rosser para ipasaka sa anum ka puntos ang abanse sang Pilipinas kontra sa Indonesia duha ka minutos antes ang final buzzer.
Ginselyuhan sang mga free throw halin kanday Chris Newsome kag Brownlee ang kadalag-an sang Gilas Pilipinas kag dalayon na nga ginpapanaog sa hulam-nga-trono ang Indonesia.
34 puntos lakip ang lima ka triples, siyam ka rebounds, kag lima ka assists ang naamot ni Brownlee kag 15 sa sini nga puntos ang iya ginbubo sa 4th quarter. Nagkamada naman sang 13 puntos si Ganuelas-Rosser kag 10 puntos si Arvin Tolentino.
Kun matandaan, ang Indonesia ang nag-agaw sang ika-14 na kuntani nga asud-asud nga gold medal sang Pilipinas sa men’s basketball sa Southeast Asian Games sang ginlutos sini ang Gilas sa finals sang nagligad nga tuig sa Vietnam.
Balantayan 4:00 karon sa hapon ang paghampang sang Gilas sa gold medal match batok sa Cambodia nga una na nga naglutos sa Pilipinas sa preliminaries paagi sa ila lima ka naturalized players halin sa Estados Unidos sang Amerika.
