Kun masarangan mo nga magtinir sa idalom sang tubig sa sulod sang pila ka minutos, indi anay magpatama sang tikal bangud may yara gali sang tawo nga nangguba sang rekord kun kalawigon lang sang tinir sa tubig ang istoryahan!
Ini amo ang isa ka researcher sa Estados Unidos sang Amerika nga amo na subong ang ginakilala nga pinakamalawig ang tinir sa idalom sang tubig nga mas malawig pa sa 73 ka adlaw nga gintinir sang duha ka professors sang 2014 sa isa man ka Largo lodge.
Ang bag-o nga record holder amo si Dr. Joseph Dituri nga 74 ka adlaw na sa idalom sang tubig sa Key Largo, Florida.
Kag wala pa ini sang plano nga mag-untat bangud may plano pa ini nga maglawig didto sa sulod sang 100 ka adlaw!
Si Dr. Dituri, 55, isa ka retired Navy officer, kag isa subong ka biomedical engineering professor sa University of South Florida.
Gin-umpisahan ang iya misyon sang nagligad nga Marso 1, kag ang mayor nga katuyuan amo nga matun-an kun paano gina-handle sang lawas sang tawo ang long-term effects sang pagtinir sa idalom sang tubig nga may yara sang extreme pressure.
Nagatinir siya sa isa ka 100-square-foot nga habitat nga nahamtang 30 ka tapak ang kadalumon halin sa surface. Ginatawag niya ini nga Jules’ Undersea Lodge.
Samtang yara siya didto, ginapadayon man ni Dituri ang pagtudlo sa biomedical engineering course apang online lamang.
Ini bangud sa amo nga underwater habitat, may yara man siya sang tululugan, may bathroom area nga may toilet kag fresh-water shower, kag may yara man sang kusina kag workspace.
Samtang padayon ang mission, may mga nagabisita man sa iya agud magdala sang pagkaon, kag may yara man sang medical team nga naga-check sa iya nga ikaayong lawas kag naga-conduct sang test.
Ginapaidalom man siya sa psychosocial kag psychological tests agud mahangpan ang mental effects kun nagaisahanon kag kun ma-stuck sa isa ka lugar nga limitado ang hulag.#
