Madamo na nga beses nga ginpamatud-an sang ido nga abyan ini sang tawo.
May yara gani sang ido nga ginbalewala ang kalayo, mabalikan lang ang iya nga tag-iya nga yara pa sa sulod sang nasunog nga balay!
Sa Japan naman, ginkilala nga isa ka hero ukon baganihan ang isa ka ido ang nagbulig sa isa ka lalaki nga ginaatake sa korason.
Ini nga ido ang lima ka tuig nga mixed-breed nga si Koume nga naga-trabaho sa isa ka horse-riding club sa Wakaba-ku, Chiba City bilang isa ka “mascot.” Nahibaluan nga tradisyon na sa amo nga club nga himuon nga empleyado ang mga babayi nga ido agud nga makatamyaw sa mga members sang club.
Ang doggy nga si Koume ang kilala man nga nanamian gid mag-upod sa tawo.
Isa ka adlaw, nagasunod ini sa isa ka lalaki sang gulpi lang natumba ang amo nga tawo.
Suno sa riding instructor nga yara sa amo nga area sang natabo ang insidentea, masami nga hipuson si Koume apang sang amo nga tion, tuman ka tunog kag wala untat ang taghol sini agud makaagaw lamang sang atensyon.
Ini ang rason kun ngaa nasapakan sang iban nga tawo ang lalaki nga kaupod sang ido, nagtawag sang ambulansya, kag nahingagaw sang paramedics nga masalbar pa ang iya nga kabuhi.
Gindayaw naman sang Wakaba Fire Department ang ginhimo sang ido kag gintawag ini nga perfect response.
Naka-recover na ang lalaki sa heart attack kag nagbalik sa nakaandan nga riding activities sa club.
Bilang pasalamat naman kag pagkilala kay Koume, ginpatambong ini sa isa special ceremony kun sa diin nakabaton ini sang letter of thanks halin sa Wakaba Fire Department.
Ginpahayag nga ang mentor ni Koume amo ang isa pa ka ido nga si Ume nga amo ang nagtudlo sa iya nga magpangayo dayun sang bulig kun may kaangay sini nga insidente.
