ILOILO CITY – Nagapati si Iloilo City Councilor Plaridel Nava nga ginkwartahan lamang sang third party consultant ang mga Ilonggo sa ginpatigayon nga geotechnical investigation sa kontrobersyal nga P680 million-Ungka flyover.
Ang third party consultant amo ang Abinales Associates Engineers Plus Consultants.
Sa interview sang Bombo Radyo kay Nava, iya ginpahayag nga dismiyado ini sa amo nga consulting firm nga ginbayaran sang P13 million agud magpatigayon sang imbestigasyon.
Suno kay Nava, wala sang kaisog ang amo nga firm nga itu-ad kun sin-o ang dapat nga sukton sa depektibo nga Ungka flyover.
Posible suno sa iya nga isa lamang ang grupo sang contractor kag sang consulting firm.
Ginpahayag dugang sang konsehal nga dapat nga may manabat gid sa natabo bangud nga public fund kag public interest ang naangut diri.
Dismayado man ang konsehal sa daw kaangay “untouchable” contractor nga International Builder’s Corporation.
Nagakadapat suno sa iya nga i-blacklist na ini ukon i-suspend.
Dako naman nga tampa para sa mga Ilonggo kun sila sa gihapon ang kuhaon nga contractor sa rectification project sa amo nga flyover.
