ILOILO CITY – Nagpasalig ang Police Regional Office VI nga wala sang dapat nga kabalak-an ang publiko sa serye sang pagpamatay sa syudad sang Iloilo.
Ang pinakaulihi nga insidente ang natabo sang damlag lang kun sa diin, nasapwan nga wala na sang kabuhi si Raymond Castro sa Parola Area sa Barangay Concepcion, Iloilo City Proper, nga naputos sa sako kag nagapa-utaw-utaw sa tubig.
Sa interview sang Bombo Radyo kay Police Brigadier General Archival Macala, officer-in-charge sang Police Regional Office VI, iya ginpahayag nga wala sang armed group sa rehiyon nga amo ang nagapamatay sa mga biktima.
Suno sa iya, may mga krimen man nga kahimu-an sang kaangay man sang biktima nga sindikato.
Dugang pa niya, kun may yara gid man sang grupo, nakahanda ang validation kag intelligence arm sang talatapan agud nga magtapna diri.
Ginpahayag man sang natungdan nga sa kaangay nga mga hitabo, indi na kinahanglan nga maghulat sang mandu ang mga kapulisan bangud responsibilidad nila nga mag-imbestigar kag magsolbar sang krimen.
