ILOILO CITY – Padayon ang koordinasyon sang Iloilo City Public Safety and Transportation Management Office sa Pavia Traffic Management Office may kaangtanan sa pagpugok sang trapiko sa Ungka, Jaro padulong sa banwa sang Pavia, Iloilo.
Kaina sang hapon, nagpagwa sang advisory ang opisina nga may yara sang pagpugok sang trapiko sa lugar apang, gilayon man nga na-manage.
Sa interview sang Bombo Radyo kay Mr. Jeck Conlu, head sang talatapan, iya ginpahayag posible nga nagtemprano pa pauli sa probinsya ang mga nagatrabaho sa syudad agud nga malikawan ang traffic congestion sa lugar.
Suno kay Conlu, wala man sang major adjustment ang opisina magluwas lamang sa koordinasyon sa traffic management office sang Pavia sa tagsa ka rush hour.
Bangud sini, naga-adjust ang traffic management sa banwa sang Pavia.
Dugang pa ni Conlu, ang iban nga mga private nga salakyan ang nagapangita sang iban nga alternative route.
