ILOILO CITY – Nagalaum ang pamunuan sang Police Regional Office VI nga mas kaayuhon pa sang mga kapulisan ang ila nga performance kadungan sang pagbaton na sang mid-year bonus subong nga tuig.
Ang mid-year bonus ang equivalent sa isa ka bulan nga basic salary sang isa ka police officer.
Ang bonuses nga nagasobra sa P90, 000 ang subject sa buwis.
Sa interview sang Bombo Radyo kay Police Brigadier General Archival Macala, officer-in-charge sang Police Regional Office VI, iya ginpahayag nga dako ang iya paglaum nga de-kalidad nga serbisyo ang mahatag sang mga personnel.
Dugang pa niya, nagakadapat nga magbaton sang mid-year bonus ang mga kapulisan bangud sa padayon nga paghatag sang proteksiyon kag serbisyo sa publiko.
Kun may reklamo naman ang publiko sa mga pulis, magdiretso lamang sa Police Regional Office VI.
Una na nga ginpahayag ni Philippine National Police Chief Police Gen. Benjamin Acorda Jr. nga ang bonuses para sa 227, 832 personnel ang magaserbe nga pamatuod sa commitment sang organisasyon para sa ika-maayo sang mga personnel.
Nagalaum man ini nga gamiton sang mga pulis sang maayo ang ila nga bonuses agud nga makabulig sa ila nga financial capability para masuportahan ang ila nga mga pamilya.
Nahibaluan nga kahapon, na-release na ang masobra P7.5 million pinaagi sa payroll accounts sang mga personnel.
Ang mga may pending nga kaso administratibo ukon ang mga nagapangatubang sa penalidad ang indi pa makabaton sang ila nga mid-year bonuses.
