Naghingyo ang grupo sang sugarcane planters sa Sugar Regulatory Administration (SRA) nga maghimo sang inventory sa suplay sang kalamay sa pungsod lakip na ang pagsulod sang 440,000 metric tons sang imported sugar nga amo ang katapusan nga importasyon nga gintugutan sang ahensya.
Sa statement ni National Federation of Sugarcane Planters Inc. president Enrique Rojas, ginpahayag nga dapat gin-una anay sang SRA ang inventory antes nagdesisyon kun kinahanglan gid man ang dugang nga importasyon.
Matandaan nga gin-anunsyo sang Malacañang nga aprubado na kay President Ferdinand ‘Bongbong’ Marcos Jr. ang pag-import sang 150,000 MT agud nga mapabilin nga estable ang presyo sang kalamay sa mga merkado sa pungsod.
Gin-athag man ni Rojas nga kun may kulang gid man base sa latest nga approved importation, dapat nga mag-import sandig sa amo lamang nga amount para sa sini nga crop year.
Nagpahayag man ini nga masunod nga batch sang imported nga kalamay ang dapat nga mag-abot sa Pilipinas antes ang masunod nga cropping season agud nga indi maapektuhan ang retail prices. #
