ILOILO CITY – Padayon ang validation sang Iloilo Provincial Agriculture Office sa impormasyon nga may yara sang presensya sang rice black bug sa Barangay Calmay kag Carigangan sa Janiuay, Iloilo.
Sa interview sang Bombo Radyo kay Dr. Ildefonso, Toledo, Jr., Iloilo Provincial Agriculturist, iya ginpahayag nga base sa initial report nga iya nabaton, 10% sang total area standing crop sa Janiuay, Iloilo ang nakitaan sang presensya sang makahalalit nga peste.
Bangud sini, nagpatigayon sang validation ang katapo sang iya opisina sa lugar agud matumod kun bala, rice black bug ang nakita sang mga mangunguma.
Suno kay Toledo, ang nasambit nga peste ang tuman ka makahalalit kun sa diin, ginasuyop sini ang duga sang pananum.
Samtang, balantayan naman ang liwat nga pagdamo sang rice black bug sa Hunyo 4 bangud sang full moon.
Ang peste ang masami nga nagagwa kun masanag ang isa ka lugar.
Agud nga matapna ang pagdamo sini, nag-abiso si Toledo nga magperform sang light trapping method agud nga ma-attract ang mga peste, tipunon sang mangunguma, isulod sa sako kag ilubong.
Una na nga na-report nga may yara sang presensya sang peste sa Concepcion, Dingle, kag Banate.
Sa data naman sang Department of Agriculture- Region VI, may yara man sang presensya sang rice black bug sa Cabatuan, kag Pototan.
