ILOILO CITY – Padayon pa nga gina-imbestigaran sang Janiuay Municipal Police Station ang pagpatay sa isa ka mangunguma sa Barangay Canawillian, Janiuay, Iloilo.
Ang biktima amo si Edgar Armada, 51, residente sang nasambit nga lugar.
Sa interview sang Bombo Radyo kay Police Captain Alwin Salmon, hepe sang Janiuay Municipal Police Station, iya ginpahayag nga ipaidalom pa sa autopsy ang bangkay sang biktima subong nga semana.
Ini agud nga matumod ang rason sang kamatayon sang biktima kag kun ano ang gingamit sa pagpatay sa iya.
Dugang pa ni Salmon, may yara na sila sang ginakaptan nga motibo sa pagpatay sa biktima apang indi pa mahimo nga mapalayag sa publiko.
Nahibaluan nga pilas sa dughan ang naagum sang biktima sang nasapwan sang iya utod sa higad sang dalan.
