ILOILO CITY – Maukod nga ginasunod sang isa ka estudyante ang ‘Paid Parking Ordinance’ sang syudad.
Ang implementation sang ordinansa ang nagasakup sa mga dalanon sa syudad nga ginalakipan sang Aldeguer, Arroyo, Arsenal, Solis, Peralta, Guanco, kag porsyon sang Ortis Street.
Sa interview sang Bombo Radyo kay Alyas Ronron nga nagikan pa sa banwa sang Alimodian, iya ginpahayag nga P15 ang iya bayad sa tagsa ka adlaw agud lamang nga makalikaw sa traffic violation.
Apisar nga nagabayad adlaw-adlaw kag dugang pa sa galastuhan, nagasunod siya sa gihapon sa ordinansa bangud suno sa iya, mas mabudlay para sa iya kun dagdagan siya sang temporary operator’s permit.
Nagpanugyan man ini sa iban nga mga motorista kag nagapanag-iya sang salakyan nga magsunod sa ordinansa agud nga makalikaw sa traffic violation.
MADAMO NA ANG NAGASUNOD
Madamo na ang nagasunod sa ‘Paid Parking Ordinance’ sa syudad.
Sa interview sang Bombo Radyo kay Carlo Pareño, Jr., pay parking collector sa Ortiz- Mapa St., iya ginpahayag nga nakahibalo na ang mga motorista kag ang mga nagapanag-iya sang salakyan nga ginapatuman na ang ordinansa.
Suno sa iya, may yara man sang mga pipila ka mga nagareklamo apang ginapaathagan lamang nila sang maayo.
Ang iban diri ang gina-refer nalang nila sa opisina sang Iloilo City Local Economic Enterprise Office.
May mga estudyante naman suno sa iya nga P15 lamang ang ginasukot bangud nga naluoy man sila.
