ILOILO CITY – Ginaproseso na sang Dumangas Municipal Police Station ang mga dokumento agud nga mapasakaan sang kaso ang isa ka lalaki nga nagbuno sa iya kasilingan sa Sitio Katunggan, Barangay Bantud Fabrica, Dumangas, Iloilo.
Ang biktima amo si Winnie Gubane, 41, construction worker kag residente sang nasambit nga barangay.
Ang suspek naman amo si Mark Surita, 33, isa man ka construction worker, kag residente sang amo nga lugar.
Sa interview sang Bombo Radyo kay Police Staff Sergeant Terrence John Soria, imbestigador sang Dumangas Municipal Police Station, iya ginpahayag nga at-large sa gihapon ang suspek.
Nagagwa sa imbestigasyon sang kapulisan nga may daan nga hiligut-anon sa ila ginatrabahu-an nga construction firm.
Kun balik-balikan, padulong na kuntani sa iya balay ang biktima sakay sang motorsiklo sang ginbangga-an sang suspek kag ginbuno sang makapila ka beses sa nagkalain-lain nga bahin sang iya lawas.
Ginhingagaw pa dala sa ospital ang biktima, apang gindeklarar nga dead on arrival sang attending physician.
