ILOILO CITY – All set na ang Philippine Coast Guard District Western Visayas sa posible pag-igo sang Super Typhoon Mawar.
Bwas sa gab-i ukon sa Sabado sang aga, ginlauman nga magsulod sa Philippine Area of Responsibility ang super typhoon.
Sa interview sang Bombo Radyo kay Lieutenant Commander Jansen Benjamin, spokesperson sang Coast Guard District Western Visayas, iya ginpahayag nga preparado na sila sa pagpatigayon sang disaster response partikular sa mga coastal areas.
Suno kay Benjamin, ginsapol na nila ang deployable response groups kag quick response teams nga amo ang magabuligay sa tion nga magsulod na ang bagyo sa pungsod.
Gin-abisuhan naman ang pito ka mga stations sa bug-os nga Western Visayas nga magbantay ilabi na sa tion sang pagbaha.
Nagpanugyan man ini sa publiko nga mag-aligmat kag magpatigayon sang koordinasyon sa mga otoridad agud malikawan ang casualty.
