ILOILO CITY – Patay ang isa ka barbero matapos ginbuno sa Barangay Golgota, Janiuay, Iloilo.
Ang biktima amo si Loreto Ardiente 28, residente sang Barangay Bongol sa amo nga banwa.
Sa interview sang Bombo Radyo kay Police Captain Alwin Salmon, hepe sang Janiuay Municipal Police Station, iya ginpahayag nga ginbuno si Ardiente samtang nagatambay sa kilid sang karsada.
Suno kay Salmon, gilayon nga nagpalagyo ang suspek matapos ang krimen.
Nag-angkon ang biktima sang pilas sa dughan kag naglapos sa iya likod.
Gindala pa sa ospital ang biktima, apang gindeklarar sang doktor nga dead on arrival.
Sa subong, may yara na sang mga person of interest sa krimen apang indi pa ini mahimo nga mapalayag sang mga otoridad.
