Agaw-atensyon ang isa ka 12-anyos nga bata nga lalaki sa California nga nag-graduate sa kolehiyo nga may indi lang isa, indi lang duha…. kundi lima gid ka degrees!
Ini nga bata amo si Clovis Hung nga ginkilala man nga pinakabata nga graduate sang Fullerton College sa California.
Nag-umpisa si Clovis sa pag-eskwela sa kolehiyo sa edad nga siyam ka tuig.
Ginpahayag sini nga nabatian niya ang istorya sang alumnus sang kolehiyo nga si Jack Rico nga nag-graduate sang 2020 sa edad nga 13-anyos kag gusto niya nga tupungan ang amo nga accomplishment.
Wala ugaling natupungan ni Clovis si Jack… bangud nalapawan pa niya ini!
Nagsaka si Clovis sa stage nga may lima ka associate sang arts degrees nga amo ang history; social sciences; social behavior and self-development; arts and human expression; kag science and mathematics.
Ginsiling sini nga may plano pa siya nga magdugang sang isa pa ka degree sa masunod nga tuig.
Nagtapos si Clovis sa Fullerton College kun sa diin halos 10 ka tuig ang abanse sang edad sang iya batchmates.
Nahibaluan nga nag-enrol ini sa Special Admit program kun sa diin ginapahanugutan ang bisan ano lang nga edad nga magkuha sang kurso para sa college credit.
Suno sa press release sang eskwelahan, wala pa nakuntento ang iloy ni Clovis nga si Song Choi sa college classes bangud gindugangan pa gid ini sang homeschooling curriculum agud nga makatuon ini sang maayo kag malab-ot ang iya kinahanglanon sa academics.
Ginlaragway naman sang iloy nga tuman ka tutom ang iya anak kag daku ang disiplina sa kaugalingon: “Clovis is super inquisitive, mature, diligent, self-disciplined, and highly motivated. He is also very curious and traditional public schools could not satisfy his curiosity, therefore, the best option was college.” #
