ILOILO CITY – Nagsugod na sa paghatag sang rain gauge ang Iloilo Provincial Government sa tagsa ka mga banwa sa probinsya sang Iloilo agud nga mapadasig ang pag-monitor sang panahon.
Sa interview sang Bombo Radyo kay Dr. Jerry Bionat, pinuno sang Provincial Disaster Risk Reduction and Management Counci, iya ginpahayag nga ang 50 ka mga rain gauge ang ginpanghatag na sa 42 ka mga banwa kag isa ka component city kun sa diin, ang mga strategic municipalities ang nakabaton sang doble.
Suno kay Bionat, ang rain gauge ang mahimo nga magamit sa tion sang bagyo.
Sa tion nga may yara sang pagbubo sang mabaskog nga ulan, i-report sang operator sa ila local government pinaagi sa radyo.
Bangud sini, gilayon nga makahimo sang desisyon ang local chief executive kag ang mga otoridad.
Ang ini nga rain gauge suno kay Bionat ang wala na nagakinahanglan pa sang kuryente ukon signal.
