ILOILO CITY – Matapos nagdaog sang gold medal sa 32nd Southeast Asian Games sa Cambodia sang nagligad nga bulan kun sa diin, na-reset ang iya record, magabalik sa field si EJ Obiena sa pinakauna nga tion.
Sa Instagram post, ginpakigbahin sang Filipino pole vault ace nga maga-compete ini sa tatlo ka mga events subong nga bulan.
Ang world no. 3 ang magapasakup sa 5th Irena Szewinska Memorial sa Hunyo 6 sa Poland antes magpadulong sa Norway para sa Sparebanken Vest Bergen Jump Challenge sa Hunyo 10 kag Bislett Games sa Hunyo 15.
Ini ang pinakauna nga pagbalik ni Obiena matapos nangin kampyon sa Cambodia Games kun sa diin, na-clear niya ang 5.65 meters agud nga makuha ang gold medal apisar sang madamol nga ulan kag mabaskog nga hangin sa Phnom Penh sang nagligad nga Mayo 8.
Target sang three-time Southeast Asian Games gold medalist nga makuha ang ikaduha nga sunud-sunod nga Olympics ticket para sa 2024 Paris Games.
Una ini nga nag-compete sa Tokyo Olympics apang napaslawan nga maka-finish sa podium.
