ILOILO CITY – Nakahanda ang Iloilo Police Provincial Office nga ihatag ang request sang Sangguniang Panlalawigan nga mag-deploy sang personnel agud nga magbulig sa pagdelihir sang trapiko sa Ungka flyover indi lamang subong nga wala sang construction works kundi mangin sa tion nga suguran na ang rectification sini.
Sa interview sang Bombo Radyo kay Police Colonel Ronaldo Palomo, director sang Iloilo Police Provincial Office, iya ginpahayag nga kun ang tinutuyo sang request amo nga makabulig sa order kag security sa lugar, nakahanda man ang ila talatapan nga maghatag.
Dugang pa niya, may bastante man sila nga personnel nga mahimo nga i-deploy sa lugar ilabi pa nga wala sang dalagko nga event sa subong.
Pahayag niya dugang, samtang nga wala pa sang pormal nga request nga naka-abot sa ila, may yara sang personnel nagikan sa Pavia Municipal Police Station nga nagahatag sang police visibility.
Makita man niya ang presensya sang katapo sang traffic management sang banwa sang Pavia.
