ILOILO CITY- Ginhatagan ni Iloilo City Mayor Jerry Treñas sang last warning ang tanan nga traffic aides nga madakpan nga naga istorya sa ila mga upod, naga- text kag nagapanigarilyo samtang naga-duty.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga ini nga statement sang alkalde ang indi dapat pagbalewalaon sang mga traffic enforcers nga nagapulupalagyo sa trabaho.
Suno kay Conlu, apisar may mga tion nga nagatipon-tipon ang mga traffic aides kun ipatawag sang supervisor agud hatagan sang instructions, indi ini rason agud nga magpabaya sila sa ila katungdanan sa dalanon.
Gin-engganyo naman ni Conlu ang publiko nga magpadala sa ila opisina sang litrato sang mga traffic aides nga nagapakita sang pagsupak sa mando sang alkalde.
Dugang pa sang natungdan, mismo ang alkalde ang nagalibot sa mga dalanon kag siya gid ang nakakita sa mga personnel nga nagatsismis lang sa duty.
