ILOILO CITY – Apisar nga wala ginapahanugutan ang Government Service Insurance System kag Social Security System, kag pila sa government-owned and controlled corporations nga mag-invest sa Maharlika Investment Corporation, mahimo sila sa gihapon nga mag-invest sa pareho nga mga proyekto nga ginapondohan sang Maharlika Investment Corporation.
Suno kay Senate Majority Leader Joel Villanueva nga amo ang nagaserbe nga caretaker sang Senado, “legit” para sa mga government-owned and controlled corporations nga magsulod sa isa ka joint venture upod sa Maharlika Investment Corporation ukon magpondo sang isa ka proyekto nga ginapondohan man sang sovereign wealth fund sa kondisyon nga indi sila magbutang sang kwtarta sa Maharlika corporation ukon sa gina-manage sini nga pondo.
Pila sa mga provisions sa idalom sang Congress-approved version sang Maharlika Investment Fund bill ang wala nagapahanugot sa government-owned and controlled corporations nga involved sa social security kag public health insurance nga mag-invest sa Maharlika Investment Corporation kag Maharlika Investment Fund.
Una na nga ginpahayag ni Finance Secretary Benjamin Diokno nga ang ini nga korporasyon ang mahimo sa gihapon nga mag-subscribe sa mga proyekto sang Maharlika Investment Corporation, bagay nga ginkabalaka sang mga mamalidha.
Ginpaathag ni Villanueva nga wala sang “Maharlika project” kundi government projects lamang nga mahimo nga mapili-an sang Maharlika Investment Corporation kag Maharlika Investment Fund agud nga mag-invest.
Apang para kay Senate Minority Leader Koko Pimentel, ini ang makabig nga “play on words” lamang.
Suno naman sa iya deputy nga si opposition Senator Risa Hontiveros, ang version nga ginduso sang Senado kag gin-adopt sang House of Representatives ang nagamandu sang absolute prohibition sang paggamit sang pondo sang Government Service Insurance System, Social Security System, PhilHealth kag pila pa ka insurance kag pension institutions.
Gin-ako man ni Villanueva nga dako nga problema ang nanari-sari nga interpretations sang Maharlika bill.
Suno sa iya, siguraduhon sang mga mamalidha nga ang pagpatuman sang pagsulundan nga himuon sang executive ang magasunod sa positions sang mga myembro sang Senado.
Ang Maharlika bill ang yara sa subong sa Senate secretariat para sa proseso sang pagtinlo sang hagna kag pagtadlong sang pila ka typographical kag clerical errors.
Ginalauman nga mapasa na sa Palasyo subong nga semana ang hagna agud nga mapirmahan ni President Ferdinand Marcos Jr.
