ILOILO CITY – Nagpositibo sa Coronavirus Disease 2019 (COVID-19) pinaagi sa Rapid Antigen Test ang siyam ka mga estudyante sa banwa sang Estancia, Iloilo.
Sa interview sang Bombo Radyo kay Dr. Maria Socorro Quiñon, pinuno sang Iloilo Provincial Health Office, iya ginpahayag nga 42 ka mga estudyante ang naka-close contact sang isa ka estudyante nga una na nga nagpositibo sa COVID-19.
Ginpaidalom sa Rapid Antigen Test ang 42 ka mga estudyante kag naggwa nga siyam sa ila ang nagpositibo sa balatian.
Suno kay Dr. Quiñon, sa siyam ka mga estudyante, pito sa ila ang nagapakita sang sintomas.
Naka-quarantine na sa isolation facility ang siyam ka mga estudyante samtang nakagwa na naman ang una nga estudyante nga nagpositibo sa balatian.
Pahayag dugang sang natungdan, isa lamang ka hulot ang mga estudyante.
Sa 42 ka mga estudyante, 35 ang fully vaccinated, isa ang partially vaccinated, isa ang nakabaton sang booster shot, kag tatlo ang wala nabakunahan.
Sa siyam nga mga nagpositibo, isa lamang ang wala nabakunahan.
Liwat naman nga nagpanawagan si Quiñon sa mga estudyante nga indi magkampante nga wala na sang virus.
Suno sa iya, kun nakabatyag sang sintomas, gilayon nga mag-isolate agud nga indi makompromiso ang bilog nga klase.
Sa subong, indi pa mahibaluan kun diin nakuha sang estudyante ang virus.
