ILOILO CITY – Padayon nga naganubo ang numero sang mga Filipino nga wala sang trabaho sa bulan sang Abril kadungan sang pagsaka sang economic activity.
Suno kay Philippine Statistics Authority chief Claire Dennis Mapa, ang numero sang wala sang trabaho nga naga-edad 15 anyos kag pasaka ang nagnubo sa 2.26 million sa April 2023 nagikan sa 2.76 million sa April 2022, buot silingon, ang unemployment rate ang yara sa 4.5% sang 50.31 million individuals sa labor force.
Ang numero sang unemployed person sa bulan sang Abril ang mas manubo kun ipa-anggid sa 2.42 million jobless persons sa bulan sang Marso subong nga tuig.
Ang numero sang employed persons naman ang nagsaka sa 48.06 million nagikan sa 45.63 million sa April 2022, buot silingon, ang employment rate ang yara sa 95.5% nga mas mataas sa 94.3% employment rate sang Abril sang nagligad nga tuig.
Ang services sector ang nag-dominate sa labor market nga may pinakadako nga share sang employed persons nga yara sa 61.1%, samtang ang agriculture kag industry sectors ang nagbug-os sang 21.9% kag 17%.
