ILOILO CITY – Nagpromisa si Department of Public Works and Highways Secretary Manuel Bonoan nga pangitaan sang paagi ang pagpakay-o sang Ungka kag Aganan flyover sa labing madali nga panahon.
Sa interview sang Bombo Radyo kay Iloilo City Mayor Jerry Treñas, iya ginpahayag nga sa ginpatigayon nga pagsinapol sang Infrastructure Development Committee sang Regional Development Council, nagpasalig ang Department of Public Works and Highways Region VI nga ginapangitaan na sang budget ang pagpakay-o sang duha ka mga flyovers.
Suno kay Treñas, kun may budget na subong nga tuig, gilayon nga plantsahon ang anuman nga construction ilabi na ang pagpasiguro sang alternate route.
Pahayag pa sang alkalde, ang tanan nga resolution nga ginapasar sang council ang dapat nga matun-an sang maayo kag maistoryahan sang Department of Public Works and Highways Region VI kag ni Engr. Nilo Jardeleza nga isa ka structural engineer.
Magapatawag naman sang special meeting ang Infrastructure Development Committee sa tion nga may yara sang bag-o nga development sa duha ka mga flyovers.
