ILOILO CITY – Naga-isahanon na lamang ang probinsya sang Antique nga hilway sa African Swine Fever sa Western Visayas.
Sa data sang Department of Agriculture Region VI, ang balatian ang naglapta sa Iloilo, Guimaras, Capiz, Aklan kag ang pinakaulihi ang Negros Occidental kun sa diin, gindeklarar na ang outbreak sa Victorias City, Bacolod City kag Pulupandan.
Una nga gin-report ang labing una nga kaso sang balatian sang Oktubre 7, 2022 sa Barangay Bita Sur, Oton, Iloilo.
Sa interview sang Bombo Radyo kay Dr. Jonic Natividad, pinuno sang Regional Task Force on ASF kag Regulatory Division sang Department of Agriculture Region 6, iya ginpahayag nga ginpatuman sa gilayon ang mga protocols sa mga apektado nga mga lugar kaangay sang culling ukon pagpatay sang baboy, surveillance, movement kag border control agud malikawan ang dugang nga paglapta sang nasambit nga balatian.
Suno kay Natividad, may yara na sang 4,163 ka mga ginpatay nga mga baboy kag dako ang posibilidad nga madugangan subong nga bulan.
Ginpahayag dugang sang natungdan, base sa abiso sang international community ilabi na sang World Organization for Animal Health, sa sulod sang 500-meter radius, nagakadapat nga ang tanan nga baboy ang patyon, kag ang mga may pig farms ang dapat nga magpasa sang blood samples kag issuance sang certificate sang status sang ila baboy.
Gintinguhaan man sang ahensya nga ginasunod ang biosecurity measures.
Samtang, nagalaum ang ahensya nga antes ang Hulyo ukon Agosto, may yara sang lihuk ang national government agud maka-secure sang bakuna ukon Avac live vaccine sa Western Visayas.
