ILOILO CITY – Masami naton mabatian nga tuman lamang ka gamay sang tsansa nga maluwas pa ang mga sakay sang nagtibusok nga eroplano.
Apang sa Colombia, tuman ang kalipay sang halos bilog nga pungsod bangud nga apat ka mga indigenous children ang nakita nga buhi, masobra isa ka bulan sang nag-crash ang ginasakyan nga eroplano.
Ang mga ini ang nakita sa Colombian Amazon rainforest nga puluy-an sang mga jaguars, man-og kag iban pa nga predators, kag subong man, armed drug smuggling groups.
Suno kay President Gustavo Petro, ipaidalom anay sa medical assessment ang apat.
Sang nagligad nga bulan, ginpahayag man ni Petro nga nakita na ang apat ka mga kabataan apang gilayon niya ini nga ginbawi bangud nga traces pa lamang sang mga kabataan ang nakita.
Ang mga kabataan nga naga-edad 13, siyam, apat kag isa ka tuig ang nagapanglakaton sa lasang humalin pa sang Mayo 1.
Ang bangkay sang piloto kag sang iloy sang mga kabataan, kag sang local Indigenous leader ang nakit-an sa crash site.
Kasunod sang pagtibusok sang eroplano, ginpatigayon ang massive search nga ginabug-usan sang 160 ka mga soldado kag 70 ka mga Indigenous people nga may ideya sa lasang.
Sa kahangawa nga magpadayon sa paglakat ang mga kabataan sang palibot sang lasang kag mabudlay ang pagpangita sa ila, naghulog sang 10,000 flyers ang air force nga may instructions sa Spanish kag sa indigenous language sang mga kabataan kag nagamandu sa ila nga magtinir lamang sa ila nahamtangan.
Naghulog man sila sang leaflets nga nagalakip sang survival tips, food parcels kag bottled water.
Suno sa militar, nakita sang rescuers ang mga kabataan ginabanta lima ka kilometro nagikan sa crash site.
