ILOILO CITY – Ginatutukan subong sang Department of Energy ang problema sang transmission lines.
Ini ang kasunod sang natabo nga lapnagon nga unscheduled power interruption sa Isla sang Panay kag sa Negros Occidental sang nagligad nga Abril.
Sa interview sang Bombo Radyo kay Energy Secretary Raphael Perpetou Lotilla, iya ginpahayag nga ginapatapos na sa subong ang pag-upgrade sang Cebu-Negros-Panay interconnection nga trasmission grid.
Suno kay Lotilla, may yara man sang upgrading projects nga ginapalano sa iban nga bahin sang Panay.
Ginhalimbawa ni Lotilla ang 69kilovolts nga transmission line sa Antique nga makabig nga backbone lamang apang nakabulig stabilize sang energy sa probinsya.
Pahayag dugang ni Lotilla, ang Panay ang end of the line na bangud nga halin pa sa Leyte ang suplay padulong sa Cebu-Negros, kag Negros-Panay gani, ginabuligan sang ahensya nga matapos na ang pag-upgrade sang transmission lines.
Nagpanawagan man ang natungdan sa Negrense nga paagyon na ang transmission lines sa ila nga probinsya bangud nga tuman na ka dako ang perwesyo nga natuga sang power interruption.
Suno kay Lotilla, may nagapamalabag didto bangud nga maguba ang matahum nga view sang lugar apang dapat suno sa iya nga unahon ang benepisyo nga makuha sang tawo.
Pahayag dugang niya, madamo pa ang hilimuon kag talapuson sa mga transmission lines sa Negros Occidental kag kinahanglan man nga i-upgrade ang mga substations.
Gindayaw man niya ang mga electric companies sa Western Visayas bangud sa maayo nga performance apang dapat man sila nga buligan kag madamo pa ang hilimuon.
Isa diri amo ang pag-examine sang pass through charges nagikan sa coal fired generation plants nga gina-abaga sang mga kunsumidor.
Kinahanglan man sang kunsumidor nga i-challenge ang mga ini nga mas kaayuhon pa ang pagpadalagan sang mga kooperatiba agud nga mapanaog ang presyo sang kuryente.
Samtang, nakita man ni Lotilla nga may yara sang imbalance sa suplay sang kuryente sa rehiyon kag indi pa estable ang sistema.
Suno sa iya, indi lamang ang Iloilo ang nagagamit sang kuryente gani ginatinguha-an na sa subong nga matigayon ang hydro plants sa Tapaz, Capiz ukon sa iban man nga bahin sang Isla.
