ILOILO CITY – Nagasinggitan sang hustisya ang pamilya sang napatay sa natabo nga aksidente sa Barangay Baldoza, La Paz, Iloilo City.
Ang mga napatay amo sanday Oliver Dela Cruz kag menor-de-edad nga si Jay Ann Mascariñas samtang 17 naman ang pilason sang gin-arado sang isa ka water tanker truck.
Sa interview sang Bombo Radyo kay Romulo Mascariñas, lolo sang napatay nga si Jay Ann, iya ginpahayag nga dapat nga manabat gid ang personnel sang City Disaster Risk Reduction and Management Office nga amo ang nag-drive sang water tanker.
Ini amo si Darryl Darwin Thulasidas, chief sang Urban Search and Rescue.
Suno kay Mascariñas, disidiso ang sila nga magpasaka sang kaso batuk kay Thulasidas.
Pahayag dugang sang natungdan, antes natabo ang aksidente, nagpaandam na si Kagawad Jerry Dunlao kag mangin ang orihinal nga driver sang truck nga indi anay pagtandugon ini.
May isa pa ka lalaki nga nagpaandam man apang nagpanindugan si Thulasidas nga masarangan man niya.
Suno pa kay Mascariñas, nagasandig sa carrier ang duha ka mga napatay kag malayo pa sa nabungguan sang truck apang wala makalikaw sang nagburhot na ini.
