ILOILO CITY- Nagpasalig si Iloilo City Mayor Jerry Treñas nga buligan sa pagpaeskwela ang utod kag bata sang mga napatay sa natabo nga trahedya sa Baldoza, La Paz.
Sa interview sang Bombo Radyo kay Mayor Trenas, iya ginpahayag nga nagkadto mismo sa iya opisina ang mga pamilya sang napatay kag naistorya mismo niya kun paano pa ang mga ini mabuligan.
Suno sa alkalde, kabahin diri ang pagpaeskwela sa bata sang lalaki nga napatay kag ang 5 ka tuig nga manghod sa dalagita nga napatay man.
Sa bahin naman sang pagbulig sang syudad sa iban pa nga injured sa insidente, nakahatag na ang syudad sang assistance para medical check kag food assistance nga halin sa city government.
Paathag sang alkalde , nagapadayon ang pagpakig-istorya sa mga biktima nga yara pa sa hospital para sa ila nga bulig nga mabaton halin sa syudad.
Nagpasalig naman ang alkalde nga makabaton sang refund ang mga nakauna gwa sa ospital paagi sa pagpresentar sang resibo sang ila hospital bill.
