ILOILO CITY – Arestado ang isa ka anay preso nga ginakabig nga regional priority high value individual sa ilegal nga droga sa ginpatigayon nga drug buy-bust operation sa isa ka lodging house sa Barangay Infante, Molo, Iloilo City.
Ang arestado amo si John Alvin Palomar, 44, residente sang Zone 2, Barangay Bakhaw Mandurriao, Iloilo City.
Nakuha sa iya ang 42 sachet sang ginapatihan shabu nga may kabug-aton nga 180 grams kag may standard drug price nga P1.2 million.
Sa interview sang Bombo Radyo kay Police Captain Glen Soliman, team leader sang Regional Police Drug Enforcement Unit, iya ginpahayag nga isa si Palomar sa mga gin-report nga nagbalik sa illegal drug activity.
Siya ang naka-agi na preso sang 2016 kag nakagwa sang 2022 bangud man sa kaangay nga kaso.
Sa subong, preso na si Palomar sa Molo Police Station kag natalana nga pasakaan sang kaso nga paglapas sang Republic Act 9165 ukon ang Comprehensive Dangerous Drugs Act of 2002.
