Sa ikaduha nga magkasunod nga tuig sa Asian Artistic Gymnastics Championships, ginkilala ang Filipino gymnast nga si Carlos Yulo bilang best performing male athlete.
Ini matapos nagtakop ang kampanya sang two-time world champion kahapon, Hunyo 18, sa Singapore nga may tatlo ka gold medals: sa parallel bars, sa floor exercise, kag sa vault.
Silver naman ang nakuha sini sa individual all-around kag bronze medal sa horizontal bar.
Mas madamo ang nahakot niya nga medalya subong nga tuig ipaanggid sa tatlo ka gold medals kag isa ka silver sa nagligad nga Asian championships.
Sa pangkabug-usan, sa bulig sang nahakot nga medalya sang 23-anyos nga Tokyo Olympian, nagpangaduha ang Pilipinas sa best performing nations. Nakuha sini ang kabug-usan nga tatlo ka gold medals, duha ka silver, kag tatlo ka bronze medals.
Nagpanguna naman ang China nga may walo ka gold medals, duha ka silver, kag tatlo ka bronze.
Kuwalipikado naman si Yulo sa World Artistic Gymnastics Championships sa Antwerp, Belgium sa bulan sang Septyembre kun sa diin tinguhaan sini nga maka-secure sang spot para sa pinakadaku nga entablado — ang 2024 Paris Olympics.
