Maga-conduct sang basketball clinic ukon special evaluation kag instruction sa Pilipinas ang assistant coach sang Los Angeles Lakers nga si Phil Handy.
Diri na sa Manila si Handy ukon mas kilala man nga “Mr. 94 Feet of the Game” agud magpatigayon sang training programs para sa local basketball coaches, elite varsity teams, kag sa Converge FiberXers sang Philippine Basketball Association (PBA).
Ginalauman nga madamo sang matun-an ang mga Pinoy sa iya nga mga itudlo nga amo man ang iya ginhimo sa pila ka greatest players sang NBA kaangay kanday Kobe Bryant, Lebron James, kag Kawhi Leonard.
Bisan ini ang una nga bes nga nakabisita si Handy sa Manila, ginpahayag sini nga excited siya nga makatuon sang dugang sa Pilipinas nga isa man ka makabig ‘basketball-crazy’ nga pungsod.
Magluwas nga nakahampang para sa US, nakahampang man si Handy sa England, France, kag Australia antes sini ginsulod ang coaching kag player development.
Isa si Handy sa ginalantaw pinakadamo nga nahibaluan sa patag sang basketball bangud ang iya teams ang nakasuld sa NBA finals sa anum ka sunod-sunod nga tuig halin sang 2015-2020.
Bilang assistant coach, tatlo na ang iya ginauyatan nga kampyonato: Cleveland Cavaliers sang 2016, Toronto Raptors sang 2019, kag Lakers sang 2020.
Gin-share sini nga paborito sini nga championship ang padaog sang Cavaliers matapos ang maragtason nga pagbangon gikan sa 3-1 deficit batok sa Golden State Warriors.
Apisar off-season para sa iya bilang Lakers’ assistant coach, ginpahayag ni Handy nga indi niya pagpahapusan ang pag-handle sa players nga iya tudluan bangud makabaton sila sang training kaangay sang paghanas man sang players sang Lakers.
“I’m gonna treat them the same way I treat Laker players, that’s what they expect anytime I step on the floor. Doesn’t matter the athlete, the gender, the skill level, they’re gonna get Phil Handy in whole just prepare to work and have some fun as you’re working,” suno kay Handy. #
