Sampaw-sampaw na ang kadalag-an sang Filipino pride nga si Lea Salonga, apang may panibag-o pa gid nga nagdugang sa iya listahan: ang mangin isa ka producer sa Broadway!
Ginpakigbahin ini sang legendary singer-actress kaupod sa screenshot sang Broadway playbill kun sa diin mabasa ang malip-ot nga introduction sa iya bilang “co-producer” sang musical show nga “Here Lies Love”.
Ang Here Lies Love isa ka disco-pop musical nga base sa concept music album ni David Byrne kag inspired sa iya research sa kabuhi ni former first lady Imelda Marcos, ang ginbansagan nga “Iron Butterfly”.
Magluwas nga co-producer, maga-perform man si Lea sa play bilang si Aurora Aquino, ang iloy ni former Senator Ninoy Aquino.
Bilang isa ka Filipina artist, espesyal para sa Tony winner ang iya nga partisipasyon sa musical bangud masaksihan ini sang audiences sa entablado kun sa diin natabo man ang iya Broadway debut bilang si Kim sa “Miss Saigon” sang 1991.
Balantayan sa sini nga Broadway production ang all-Filipino cast kun sa diin featured man sanday Arielle Jacobs bilang si Imelda Marcos, si Jose Llana bilang Ferdinand Marcos Sr., kag si Conrad Ricamora bilang si Ninoy Aquino.
Yara man ang Grammy-winning musician nga si H.E.R. bilang kabahin sang producing team.
Nag-umpisa ang previews sang play sang Hunyo 17 kag sa Hulyo 20 naman ang official opening schedule. #
