ILOILO CITY – Nangin positibo ang resulta sang pinakauna nga hearing sang Iloilo City Council may kaangtanan sa ginaduso nga Traffic Adjudication Board.
Sa interview sang Bombo Radyo kay Councilor Romel Duron, proponent sang ordinansa, iya ginpahayag nga wala man sang nangin problema kay Public Safety and Transportation Management Office head Mr. Jeck Conlu ang nasambit nga ordinansa bangud nga suno sa iya, bentaha man ini sa ila nga talatapan.
Suno kay Duron, pamunuan sang Iloilo City Legal Office ang board kag ang chairman sang Committee on Transportation sa Iloilo City Council ang magaserbe nga vice chair kag may yara sang mga myembro.
Dugang pa ni Duron, adjudication board kag indi adjudication office ang tukuron bangud nga wala na ginapahanugutan sang alkalde ang pagtukod sang isa pa ka opisina base man sa gin-anunsiyo sang Department of Budget and Management bangud nga magakinahanglan ini sang budget.
Ang ini nga board ang magabaton sang tanan nga administrative complaints samtang ang mga criminal complaints naman ang i-refer sa korte.
Nahibaluan nga katuyu-an sang amo nga ordinansa nga ma-settle ang mga kontrobersiya kag maga-serbe man nga dalangpan kun may indi paghangpanay sa tunga sang traffic aide kag sa ginatudlo nga traffic violator.
