ILOILO CITY – Ginkalipay sang Iloilo City Police Office ang pagbalik sang 68 ka mga personnel nga naka-detach service sa regional headquarters.
Ang mga personnel ang ginpresentar kadungan sang ginpatigayon nga flag raising ceremony sa Iloilo City Hall kag kay Iloilo City Mayor Jerry Treñas.
Sa interview sang Bombo Radyo kay Police Colonel Joeresty Coronica Coronica, director sang Iloilo City Police Office, iya ginpahayag nga nagalaum ini nga mabuhinan ang ano man nga sahi sang krimen sa syudad kag mangin palaagyan agud madugangan ang accomplishments sang opisina.
Suno kay Coronica, ini man ang mangin preparasyon para sa nagahilapit nga 2023 Barangay and Sangguniang Kabataan Elections sa Oktubre.
Ginpahayag dugang sang natungdan, ang mga personnel ang gin-abisuhan nga mag-report sa ila tagsa ka units agud mahatagan sang katungdanan sang ila commanding officers.
Nagpahanumdom naman si Coronica nga kinahanglan nga tungdan sang mga ini ang operational duties kasunod sang mando ni Police Brigadier General Villaflor, ang acting director sang Police Regional Office 6.
Nahibaluan nga pagbalik sang mga personnel sa Iloilo City Police Office ang may kaangtanan sa tinutuyo ni Villaflor nga tutukan kag pasanyugon ang police visibility kag mobilization agud masiguro ang kalinong sa syudad.
