ILOILO CITY – Halos katunga pa sa mga banwa sa probinsya sang Iloilo ang wala pa nakalab-ot sa target nga numero sang mga ido nga mabakunahan kontra sa rabies.
Sa data sang Office of the Provincial Veterinarian subong nga adlaw, Hunyo 22, may nabilin pa nga 20 ka mga banwa kag isa ka component city nga wala nakalab-ot sa target nga 70% sang dog population.
Sa interview sang Bombo Radyo kay Dr. Darel Tabuada, pinuno sang talatapan, iya ginpahayag nga Pebrero tubtob Abril pa kuntani ang gin-set nga deadline agud nga malab-ot ang target.
Ang rason sang mga banwa amo ang kakulang sang resources kag may pila ka mga sirkumstansya nga indi mapa-iway.
Apang may iban naman nga mga banwa nga naulihi sa pagsugod sang vaccination rason nga nagapadayon pa ang ila nga kampanya sa subong.
Bangud sini, ginpahayag ni Tabuada nga nagpadala na sila sang sulat sa mga natumod nga banwa nga wala nakalab-ot sa target.
Nagpanawagan naman ang natungdan sa mga banwa nga gamiton ang tanan nga bakuna nga ginhatag sang probinsya.
Ang provincial government ang nag-allocate sang P8 million nga budget para sa pagbakal sang 20, 150 vials sang bakuna agud nga mabakunahan ang at least 215,000 nga mga ido ukon 70 percent sang 307,578 nga total population.
Nakahanda naman ang talatapan nga maghatag sang resources kun kinahanglan.
Nahibaluan nga katuyu-an sang canine vaccination program nga mapanubo ang rabies cases sa probinsya sa masunod nga mga tinuig.
