ILOILO CITY – Wala nagapati si former Local Civil Registrar head Romeo “Juncae” Manikan Jr. nga madumot nga tawo si Iloilo City Mayor Jerry Treñas.
Ini ang sabat ni Manikan sa pahayag ni Treñas nga indi ini madumot kag bukas ini nga mag-reconcile sa iya sa pihak sang legal battle sa tunga sang magtimbang nga bahin.
Sa interview sang Bombo Radyo kay Manikan, iya ginpahayag nga isa ka maayo nga tawo ang alkalde kag sa pagkamatuod, nagalaum man ini nga mag-ayuhay sila nga duha.
Ginlaragway pa niya ang alkalde nga isa ka maayo nga tawo kag lider sang syudad nga isa man sa mga maninoy sang iya naga-isahanon nga anak.
Samtang, ginpahayag sang natungdan nga wala pa nagtakup ang kaso sa ulihi nga pag-dimiss sang Office of the Ombudsman sa duha ka mga kaso nga gin-file niya batuk sa alkalde nga gin-dimiss bangud sa kakulang sang merito kag nagaka-igo nga ebidensya.
Mahimo suno sa iya nga mag-file pa sila sang motion for reconsideration ukon mag-appeal.
Sa pahayag naman sang alkalde nga ginatun-an sang iya team ang pagpasaka sang kaso batuk sa iya, ginpahayag ni Manikan nga nakahanda man ini nga mag-atubang kag magsabat.
Kun balik-balikan, si Manikan ang gin-dismiss sa serbisyo bangud sa ginapahayag nga pagbaton sang kwarta nagikan sa kliyente may kaangtanan sa pagproseso sang birth certificate.
Nag-file ini sang appela batuk sa iya dismissal sa Civil Service Commission.
