ILOILO CITY – Gin-relieve bilang hepe sang Carles Municipal Police Station si Police Major Robert Jayson Pancha.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga ang direktiba ni Police Colonel Ronaldo Palomo nga i-relieve si Pancha ang may katuyu-an nga indi maapektuhan ukon mamalisyahan ang ginapatigayon nga imbestigasyon sang provincial headquarters sa isyu nga ang Iloilo Provincial Bantay Dagat Task Force pa ang nakadakop sang “Super Hulbot” fishing boats sa marine waters sang amo nga banwa.
Sang Hunyo 15, nadakpan sang task force ang mga iligal nga nagapangisda sakay sa F/B Jot-6 kag F/B Genesis nga nagapatigayon sang hulbot-hulbot sa Barangay Asluman, Gigantes Island.
Suno kay Araño, wala ini nagakahulugan nga may sala na ukon kakulangan si Pancha bilang hepe sang Carles Municipal Police Station.
Gin-ako man sang natungdan nga kalabanan sa mga police stations sa probinsya ang may kakulangan sa numero sang mga personnel.
Apang sa bahin sang Carles Municipal Police Station, ginpahayag ni Araño nga may mga ongoing activity ang kapulisan agud nga matapna ang illegal fishing sa banwa.
Sa subong, temporaryo nga i-assign sa provincial headquarters si Pancha samtang buslan naman ini temporaryo sang iya deputy nga si PLt. Cedrick Cruz.
