ILOILO CITY – Nakahanda ang Philippine Basketball Association nga maghatag sang bulig sa Gilas Pilipinas bangud sa kakulang sang manpower samtang nagapanghanda para sa FIBA World Cup.
Suno kay Commissioner Willie Marcial, naka-istorya niya si national team head coach Chot Reyes may kaangtanan sa pagdugang sang league players sa World Cup pool.
Ang Gilas Pilipinas ang yara subong sa Europe para sa serye sang exhibition games sa handum nga makabalik sa Oylmpics sa pinakauna nga tion humalin sang 1972.
Target sang Samahang Basketbol ng Pilipinas nga mangin highest-ranked Asian team, apang nagapabilin nga tunok ang world No. 10 Italy, No. 23 Dominican Republic, kag No. 41 nga Angola sa group stage.
Sa pila ka semana nga pagtinir sa Europe, maka-atubang sang Gilas Pilipinas ang national teams sang Finland nga naga-feature sang NBA All-Star Lauri Markkanen, ang Estonia kag ang under-21 squad sang Lithuania.
Lakip sa mga gindala ni Reyes amo sanday June Mar Fajardo, Japeth Aguilar, Kiefer Ravena, CJ Perez, Thirdy Ravena, kag Poy Erram.
Yara man sa team sanday Chris Newsome, Scottie Thompson, Jamie Malonzo, Dwight Ramos, AJ Edu, kag Rhenz Abando.
Ang mga naturalized players nga sanday Ange Kouame kag Justin Brownlee ang magasunod man.
Sa tion nga makabalik na ang team, liwat nga maga-istoryahanay sanday Marcial kag Reyes agud nga hambalan ang pag-augment sa naganipis na nga roster.
Ang 21-man training pool nga kuhaan sang final 12-man lineup ang naka-agum sang pila ka injuries kag iban nga commitments.
Sanday Roger Pogoy, Calvin Oftana, Bobby Ray Parks, kag Jordan Heading ang wala nakasunod sa trip bangud padayon pa sila nga naga-recover.
Samtang, ang Utah Jazz guard nga si Jordan Clarkson ang yara pa sa Estados Unidos kag si Kai Sotto ang natalana nga maghampang para sa Orlando Magic sa NBA Summer League.
