Kun aksidente mo nga nasamaran ang imo kaugalingon, masami nga nagapangayo ka sang bulig sa iban agud mabulong ang imo pilas.
Apang sa bahin sang isa ka lalaki sa Chicago, nagapangatubang pa ini sang kaso matapos sini ginsugid sa pulis nga aksidente niya nga natiro ang iya nga tiil!
Ang 62-anyos nga lalaki nga si Mark Dicara residente sang Lake Barrington sa Illinois.
Isa ka adlaw, ginpatawag ang Lake County Sheriff deputies bangud sa report nga may isa ka tawo nga nagsuprer sang gunshot wound.
Sang nag-abot ang pulis, didto na kag nakit-an si Dicara nga nagakawad-an sang madamo nga dugo kag dali-dali ini nga gindala sa ospital.
Sang ulihi, ginsugid sini sa mga imbestigador nga nagdamgo siya nga may nagsulod sa ila nga balay kag sa pagpati nga isa ini ka kawatan, ginkuha niya ang iya nga .357 Magnum revolver.
Gintiro niya ang tawo nga nagsulod, apang amo na lang ang iya nga palak kag namurag-muragan bangud iya mismo tiil ang iya nga gintiro.
Didto kag nadiskubrehan pa gid sang pulis nga revoked na ang state firearm owner’s identification card apang ginahuptan pa ni Dicara ang armas.
Ang natabo, gin-isyuhan pa sang warrant ang lalaki bangud sa possession sang armas nga wala sang valid Firearm Owners Identification card kag ginpasakaan ini sang kaso nga reckless discharge of a firearm.
Gin-aresto pa ini sang pulis apang ginpaguwa man matapos nakapyansa. Natalana sa Hunyo 29 ang hearing sa korte suno sa pulis. #
