Mapait ang nangin kapalaran sang Pilipinas sa pagbukas sang Fiba Women’s Asia Cup matapos nagdangat sa 71 ka puntos ang abanse sang Australia sa hampang sa Sydney Olympic Park Sports Centre.
Ginkamasaan sang World Rank Number 3 nga Opals ang Gilas Women, 105-34, sa pagpanguna sang Aussie players nga sanday Darcee Garbin kag Lauren Scherf nga may tag-18 kag 17 puntos.
Ginbuksan sang Australia ang hampang sa 16-2 scoring spree; kag magluwas sa 26-16 nga skor sa second frame, napaslawan na ang Pilipinas nga makahimo sang double digits sa nabilin nga mga quarter.
Si Vanessa de Jesus lamang ang naga-isahanon nga Filipino player nga naka-double digits sa hampang matapos nakahimo ini sang 18 ka puntos.
Atubangon sang Gilas Women subong nga adlaw ang team sang Japan nga six-time winner kag amo man ang defending champion.
