ILOILO CITY – Ginbaton ni Iloilo City Mayor Jerry Treñas ang resignation ni Mrs. Ninda Atinado, executive assistant kag nagaserbe nga pinuno sang Beautification Division.
Si Atinado ang gina-angut sa kontrobersyal nga pagpa-utang sa mga job hires sa Iloilo City Hall.
Ginapahayag nga ang indi mag-utang nga mga job hires ang wala niya ginapa-renew.
Sa interview sang Bombo Radyo kay Treñas, iya ginpahayag nga una na nga nag-file na sang leave of absence si Atinado kag kahapon lang niya gin-aprubahan ang resignation.
Suno sa alkalde, antes sini, ginpirmahan niya ang recommendation sang Iloilo City Legal Office nga mag-proceed sa legal investigation nga nagresulta sa preventive suspension batuk kay Atinado kag sa iya anak.
Paathag sang alkalde, hibaluon pa niya kun ano gid ang rason ni Atinado sa iya resignation.
Kasunod sang resignation ni Atinado, magaserbe nga officer in charge sang Beautification Division si Engr. Neil Ravena.
