ILOILO CITY- Dismayado ang Iloilo Police Provincial Office kasunod sang pagkaaresto sa isa ka punong barangay nga nabaklan sang iligal nga druga sa ginpatigayon nga buy bust operation sa San Enrique, Iloilo.
Ang arestado amo si Punong Barangay Elvie Paez, 47, sang Lip-ac, San Enrique, Iloilo nga nabaklan sang isa ka sachet sang suspected shabu nga nagabalor sang P1,000 kag nakuhaan pa sang dugang nga 11 ka mga sachets kag duha ka improvised short firearms.
Sa interview sang Bombo Radyo kay PMaj Rolano Araño, spokesperson sang Iloilo Police Provincial Office, iya ginpahayag nga kun sin-o pa kuntani ang nagabulig sa ila kampanya batok sa iligal nga druga, amo pa ang nagatinunto kag nagahimo sang iligal nga buluhaton.
Apang suno kay Araño, ang pagkadakop kay Paez ang pamatuod nga wala sang ginapili nga dakpon ang otoridad.
Sa subong, preso na ini sa San Enrique Municipal Police Station kag natalana nga pasakaan sang kaso nga paglapas sa Republic Act 9165 ukon ang Comprehensive Dangerous Drugs Act of 2002.
