ILOILO CITY – Ginakabig sang Chairman sang Commitee on Public Utilities sa Iloilo City Council nga tuman ka pa temprano agud magpangayo sang Resolution of No Objection (RONO) ang isa ka pribado nga kumpaniya sa pagpatukod sang 25 ka mga wind turbines sa syudad.
Sa interview sang Bombo Radyo kay Iloilo City Councilor Atty. Romel Duron, iya ginpahayag nga nagpadala sang sulat sa konseho ang Energy Company nga First Gen Corporation agud magpabutyag sang interes sa pagpatukod sang wind turbine generators kag substation kag transmission line nga magakonekta sang wind farm sa substation sang National Grid Corporation of the Philippines (NGCP).
Ini ang ipahamtang sa Iloilo Strait, nga napatung-an sang Iloilo City kag Guimaras.
Suno kay Duron, santo sa sulat sang nasambit nga Energy Company, luyag nila nga makabulig sa mga pumuluyo sang syudad nga nakaeksperyensya sang power shortages sa diin nakaepekto ini sang dako sa ekonomiya.
Ini nga proyekto ang santo sa Wind Energy Service Contract nga ginsudlan sang gobyerno sang Pilipinas nga gintiglawas sang Department of Energy.
Sakop sang sini nga proyekto ang 5,346 ka ektarya sa syudad sang Iloilo kag banwa sang Zarraga kag Dumangas sa probinsya sang Iloilo kag banwa naman sang Buenavista sa Guimaras.
Kun isa-isahon, lakip sa mga lugar nga maagyan sang proyekto amo ang Ingore kag Hinactacan, La Paz kag Bito-on sa Jaro, Iloilo City; Camangay, Bigke, Balagon, Gua-an, Napnud kag Nabitasan sa Leganes, Iloilo; Tubigan sa Zarraga kag Bantud Fabrica, Dacutan kag Sapa sa Dumangas, Iloilo kag Sawang, Dagsa-an, Taminla, Tacay, Getulio kag San Miguel sa Buenavista, Guimaras.
Apang suno kay Duron, indi pa sila makadali-dali hatag sang RONO sa nasambit nga Energy Company bangud wala pa man ang mga ini nakapatigayon sang public consultation.
Magluwas diri, kulang pa ang ila mga business permit kag wala pa nakapakighinun-anon sa Department of Environment and Natural Resources.
